اردو زبان و ادب پر نو آبادیاتی اثرات کا جائزہ لینا اور ادب کے نمونوں کا نوآبادیاتی نکات میں ازسر نو تجزیہ کرنا تنقید ادب کا ایک نیا اور روشن باب ہے۔ ۱۸۵۷ء کے بعد مسلمانوں کو زوال سے نکالنے اور انھیں جدید تصور سے آراستہ کرنے کے لیے سرسید احمد خان کی خدمات نمایاں قدر کی حامل ہیں۔ محمد حسین آزاد کی کتاب نیرنگِ خیال میں سرسید احمد خان کا کردار اس نو آبادیاتی دور میں ایک امید کی کرن کے طور پر ابھرتا ہوا دکھایا گیا ہے۔ تمثیلی پیرائے میں اس کردار کو پیش کرتے ہوئے نو آبادیاتی ایجنڈے کے خدوخال بھی واضح کیے گئے ہیں۔