Volumeمستنصر حسین تارڑ کا شمار ان سفرنامہ نگاروں میں ہوتا ہے جنھوں نے جدید سفرنامے کو افسانے سے ہم آہنگ کرکے قارئین کے لیے مزید قابل مطالعہ بنایا اور ایک بہت بڑے حلقے کو سفرنامے کی جانب متوجہ کیا۔ انھوں نے اپنے پہلے سفرنامے "نکلے تری تلاش میں" کے ساتھ ہی شہرت کی بلندیوں کو چھو لیا۔ ان کے سفرناموں کی مقبولیت کا اصل سبب ان کا افسانوی اسلوب اور رومانوی کردار ہیں۔ ان کے سفرناموں میں رومانیت اور جنسیت کے پہلو نظر آتے ہیں۔ان سفرناموں میں خودنمائی کا عنصر بھی ملتا ہے ۔ وہ سفر کے حالات کے ساتھ ساتھ قاری کی دلچسپی کو بھی مدنظر رکھتے ہیں اور رومانوی انداز اپناتے ہیں ۔اس کے ساتھ ساتھ وہ افسانوی تکنیک سے بھی استفادہ کرتے ہیں۔ یہی ان کے سفرناموں کی نمایاں خصوصیت ہے۔ مستنصر حسین تارڑ وہ رجحان ساز سفرنامہ نگار ہیں جو فطرت میں شامل کھوج کی تسکین کے لیے اور نئی منزلوں کی تلاش میں سفر اختیار کرتے ہیں۔
