Volumeمیر تقی میر کو جب بھی پڑھا جائے وہ ایک نئی شان سے ہمارے سامنے آتا ہے اور شاید اسی وجہ سے انھیں ‘‘خداے سخن’’ کہا جاتا ہے۔ میرؔ کی یہ شان رنگ زمانہ کے ساتھ ساتھ بدلتی رہتی ہے اور ہر دور میں ایک نیا میر ؔہمارے سامنے آ کھڑا ہوتا ہے۔ یوں ہر نسل اپنامیرؔ خود دریافت کرتی ہے۔ چناں چہ اردو ادب میں میر شناسی کی مستحکم روایت موجود ہونے کے باوجود یہ ضرورت تاحال موجود ہے کہ میر کو ازسر نو پڑھا اور سمجھا جائے۔ شمس الرحمان فاروقی کی شعر شور انگیز بھی میر شناسی کی روایت کی ایک مضبوط کڑی ہے جو ایک عظیم وضخیم منصوبے کی صورت میں چار جلدوں میں موجود ہے۔ فاروقی کے اس کارنامے کو علمی اور ادبی حلقوں میں بھی خاطر خواہ پذیرائی حاصل ہوئی اور انھیں ہندوستان کے سب سے بڑے ادبی ایوارڈ ‘‘سرسوتی سمان’’سے بھی سرفراز کیا گیا۔ زیرِ نظر مقالہ شمس الرحمان فاروقی کے اسی شاہ کار کا تنقیدی جائزہ پیش کرتا ہے۔
