Volumeرشید حسن خان کی تحقیقی اور تدوینی خدمات کارہاےنمایاں کی حیثیت رکھتی ہیں۔ ان کی تحقیق نئے محققین کے لیے مشعلِ راہ ہے۔ ان کے کچھ تحقیقی منصوبے ایسے بھی ہیں جو تکمیل کی منزل تک نہ پہنچ سکے اور زندگی کی مہلت ختم ہو گئی۔ایسے تحقیقی منصوبوں میں کچھ تو وہ ہیں، جنھیں وہ اپنی زندگی میں مکمل کر گئے تھے لیکن شائع نہیں کر پائے۔ اس کے علاوہ کچھ کام ایسے تھے جن کا خاکہ تیار ہو چکا تھا اور مواد کی جمع آوری جاری تھی لیکن وہ کام ان کی توجہ سے محروم رہے۔ تاہم وہ جن خطوط پر کام کرنا چاہتے تھے، مقلدین کے لیے ان کا جاننا مفید طلب ہو سکتا ہے۔ اسی امر کو ملحوظ رکھتے ہوئے اس مضمون میں رشید حسن خاں کے تحقیقی کام کے طریقۂ کار اور مکمل اور نامکمل تحقیقی منصوبوں کی تفصیل دی گئی ہے۔
