انگریزوں کی آمد سے قبل بلوچستان میں اردو زبان کی رسائی چند ہندو تاجروں تک محدود تھی۔ سرکاری، درباری، عدالتی اور سفارتی سطح پر بلوچستان میں فارسی زبان کا دور دورہ تھا۔ اردو باقاعدہ طور پر بلوچستان میں انگریزوں کے تسلط کے بعد رائج ہوئی۔ بلوچستان میں ادبی سرگرمیوں کا آغاز مشاعروں سے ہوا۔ لورالائی میں پہلا مشاعرہ ہوا اور اسی شہر سے پہلا ادبی رسالہ بھی شائع ہوا۔ ملا محمد حسن براہوی بلوچستان میں اردو کے ابتدائی دور کے شاعر ہیں۔ مقالہ نگار نے بلوچستان کی اردو شاعری کو پانچ ادوار میں تقسیم کر کے اس کا ارتقائی جائزہ پیش کیا ہے۔