Volumeانیسویں صدی کے علماے اہلِ سنت کی اردو تصانیف کے مطالعے سے واضح ہوتا ہے کہ انھوں نے صرف مذہبی موضوعات پر ہی قلم نہیں اٹھایا بلکہ اردو ادب کی معروف اصناف میں بھی ان کی تصانیف موجود ہیں جو یقیناًاپنی اہمیت کے اعتبار سے اردو ادب میں نہایت گراں ہیں۔علماے دین نے اردو شاعری میں گراں قدر اضافے کیے۔مقالہ نگار نے کم و بیش ستر ایسے علماے کرام کا ذکر کیا ہے جو اردو میں شاعری کرتے تھے۔ ان میں کئی صاحب دیوان بھی تھے- بعض علماےکرام کے تذکروں میں اردو شعر بھی ملتے ہیں۔ ایسے شعرا میں مولوی غلام جیلانی، مولوی محمد سعید الدین کاکوروی، مولوی عبداللہ دہلوی، مفتی صدر الدین آزردہ، مولوی حبیب النبی، مولوی حبیب احمد، مولوی فیض احمد بدایونی، مولوی نجم الدین چڑیا کوٹی کے نام اہم ہیں- اردو شاعری کے علاوہ اردو نثر کے فروغ و ارتقا میں بھی علماےکرام نے اہم خدمات سرانجام دیں۔ انھوں نے مذہبی موضوعات کے علاوہ تاریخ، سوانح، تذکرہ، لغت نویسی، میلاد نگاری اور سیرۃ النبیﷺ پر کتابیں تصنیف کیں۔ علماے اہل سنت نے انیسویں صدی میں اردو نثر و شاعری اور زبان کے فروغ و ارتقا میں نہایت اہم کردار ادا کیا-
