اردو صحافت کے آغاز کے ساتھ ہی اردو کے صحافتی ادب کا بھی آغاز ہو گیا۔ اردو صحافت کے آغاز کے وقت مقامی معاشرے کا عمومی رجحان ادب پرست تھا، چناں چہ شروع کے اردو اخبارات و جرائد میں زبان اور اسلوب کی سطح پر ادب کے اچھے خاصے اثرات دیکھے جا سکتے ہیں۔ اس مقالے میں اردو کے صحافتی ادب کی تعریف، اردو صحافت کا آغاز اور صحافتی ادب کے آغاز و ارتقا اور اس کی تاریخ کا مختصر جائزہ پیش کیا گیا ہے۔ مختلف ادوار کے صحافتی ادب کے اسلوب کی وضاحت کے لیے اقتباسات بھی شامل کیے گئے ہیں۔