مذہبی اقدار کا تحفظ ہمیشہ سے کشمیریوں کی سب سے بڑی ترجیح رہا ہے۔ کشمیریوں کو حضورﷺ سے کس قدر عقیدت ہے اس کا اندازہ اس بات سے لگایا جا سکتا ہے کہ کشمیری شعرا میں نعت گوئی کا رجحان آغاز ہی سے ہے۔ بیش تر شعرا نے آپﷺسے اپنی عقیدت کا اظہار شاعری کے ذریعے کیا ہے جب کہ کچھ شعرا کے پورے کے پورے مجموعہ ہاے کلام نعتیہ شاعری پر مبنی ہیں۔ انھی شعرا کے حوالے سے اس مقالے میں آزاد کشمیر میں اردو نعتیہ شاعری کی روایت کا جائزہ لیا گیا ہے۔